Azərbaycanın müxtəlif bölgələrindən olan 6 qadın Brüsseldə “Avropa inkişaf günləri”ndə təqdimatla çıxış edib.

Azərbaycanlı qadınların təqdimatı “Kənd yerlərində qadınlar və inkişaf” panelində dinlənilib. Dünya Bankının, Avropa Parlamentinin, dünyanın məşhur maliyyə və texnologiya şirkətlərinin rəhbərlərinin, inkişaf üzrə ekspertlərin çıxış etdiyi tədbirdə kənd qadınlarının müasir dünyada yeri, biznes imkanları, onlara lazım olan dəstəklər müzakirə edilib.

Müzakirələrdə dövlət və özəl qurumların innovasiyalar tətbiq etməklə kənd yerlərində yaşayan qadınların resurslara və bazarlara çıxışını asanlaşdırmaq imkanlarına toxunulub. Kənd qadınlarının dəvət aldığı yeganə ölkə kimi Azərbaycan qadınları Balakən, Masallı, İsmayıllı, Ağdam rayonlarında yaradılmış qadın inkişaf qrupları, yerlərdə biznes imkanları barədə danışıblar.

Qeyd edək ki, Azərbaycanda kənd yerlərində qadın inkişaf qrupları Kənd Təsərrüfatı Nazirliyi yanında Kənd Təsərrüfatı Layihələri və Kreditlərin İdarə Edilməsi üzrə Dövlət Xidmətinin həyata keçirdiyi Kənd İnvestisiya Layihəsi çərçivəsində yaradılır. İlk qrup bu ilin martında Masallı rayonunun Çaxırlı kəndində yaradılıb, hazırda 7 qadın qrupu fəaliyyətə başlayıb və bu qrupların sayı artmaqdadır.