Aqrar Məşğulluğun Artırılması Layihəsinin (AMAL) iştirakçılarının “İsmayıllı regionunda gənc fermerlərə dəstək” layihəsi Yaponiya Beynəlxalq Əməkdaşlıq Agentliyinin (JICA) keçirdiyi müsabiqədə qalib olub. Azərbaycan və Yaponiya hökumətləri arasında əməkdaşlıq çərçivəsində bu ölkədə təlim keçmiş gənc fermerlər kiçik qrantlar qazanıblar.

Kənd Təsərrüfatı Nazirliyi yanında Aqrar Kredit və İnkişaf Agentliyinin həyata keçirdiyi AMAL layihəsinin benefisiarlarına – İsmayıllı rayonundan olan 5 gənc fermerdən ibarət qrupa fəaliyyətlərinin təkmilləşdirilməsi üçün 5 ədəd qoyun qırxma avadanlığı, 2 ədəd çadır, 2 ədəd portativ generator, 4 qutu peyvənd iynəsi və 2 ədəd su çəni təqdim edilib.

Qeyd edək ki, aqrar sahədə gənclərin rolunu artırmaq məqsədilə həyata keçirilən AMAL 2019-cu ilin fevralından icra olunur. İndiyədək layihədən ölkənin müxtəlif rayonlarında 1000-ə yaxın gənc fermer faydalanıb.