• Ana səhifə
  • Xəbərlər
  • Pambıq sovkasının ikinci nəslinə qarşı bioloji mübarizə  tədbirlərinə başlanılıb
Pambıq sovkasının ikinci nəslinə qarşı bioloji mübarizə  tədbirlərinə başlanılıb

Pambıqçılıqda yüksək və keyfiyyətli məhsul almağın əsas şərtlərindən biri də pambığın zərərverici, xəstəlik və alaq otlarına qarşı vaxtında, düzgün və səmərəli mübarizə tədbirlərinin həyata keçirilməsidir.

Kənd Təsərrüfatı Nazirliyi yanında Aqrar Xidmətlər Agentliyinin Abşeron Rayonlararası Bioloji Laboratoriyasının dəstəyi ilə respublikanın bütün pambıqçılıq rayonlarında pambıq sovkasının təbii düşməni və zərərvericinin yumurtası ilə qidalanan parazit həşərat olan trixoqrammadan istifadə edilməklə pambıq sovkasının birinci nəslinə qarşı mübarizə tədbirləri yekunlaşıb, ikinci nəslinə qarşı bioloji mübarizə tədbirlərinə başlanılıb.

Qeyd edək ki, fermer və sahibkarların əvvəlki illərlə müqayisədə bioloji mübarizə üsuluna marağı daha da artıb. Belə ki, Aqrar Xidmətlər Agentliyinin mütəxəssisləri tərəfindən aparılan müşahidələrə əsasən pambıq sovkasının ikinci nəslinə qarşı Ağdam rayonunda 600 hektar, Ağcabədi rayonunda  800 hektar, Bərdə rayonunda  600 hektar, Beyləqan rayonunda 1000 hektar, Tərtər rayonunda  250 hektar, İmişli rayonunda 680 hektar, Ağsu rayonunda 150 hektar,  Kürdəmir rayonunda 700 hektar, Sabirabad rayonunda  600  hektar, Saatlı rayonunda  200 hektar, Biləsuvar rayonunda  260 hektar, Cəlilabad rayonunda  40 hektar, Goranboy rayonunda 100 hektar, Hacıqabul rayonunda 100 hektar, Ucar rayonunda 10 hektar, Evlax rayonunda 110 hektar, Zərdab rayonunda  350 hektar, Füzulu rayonunda 25 hektar, Hacıqabul  rayonunda 110 hektar, ümumilikdə 6685 hektar  sahədə bioloji mübarizə üsulu  həyata keçirilib.

Bioloji mübarizə üsullarından olan trixoqramma tüfeylisi Azərbaycanda Abşeron rayonlararası bioloji laboratoriyasında çoxaldılır və tarlalara buraxılır. Buna görə də çoxaldıldığı laboratoriyanın temperatur və rütubət şəraiti təbiətdəkinə uyğunlaşdırılıb.        

Trixoqramma olduqca kiçik, pərdəqanadlı həşərat olub 0,5-0,8 mm uzunluğundadır. Həşərat öz yumurtasını müxtəlif kəpənəklərin (pambıq sovkası, kələm kəpənəyi, payızlıq əkin sovkası, gövdə kəpənəyi) yumurtasının daxilinə qoyur.

Tüfeylinin hər bir dişi fərdi 40-a qədər yumurta qoyur və yumurtadan çıxan sürfə zərərvericinin yumurtasının daxilini yeyərək məhv edir. Yumurta içərisində trixoqrammanın inkişafı 8-11 gün ərzində başa çatır.

Normativ texniki sənədlərə əsasən zərərverici orqanizmlərin hər nəslinə qarşı üç dəfə trixoqrammanın tətbiqi nəzərdə tutulur. Trixoqramma tüfeylisinin bioloji səmərəliliyi zərərli orqanizmlərin hər generasiyasının sonunda, təsərrüfat səmərəliliyi isə məhsul yığımının sonunda müəyyən olunur.

Trixoqrama vasitəsi ilə həyata keçirilən bu bioloji mübarizə üsulunun qarğıdalı, bostan bitkiləri və meyvəçilikdə də istifadə olunması məqsədəuyğundur. Bu prosesdən gözlənilən nəticə kimyəvi preparatların tətbiqinin məhdudlaşdırılması, məhsulun maya dəyərinin aşağı salınması, keyfiyyətli və təhlükəsiz məhsulun əldə olunmasıdır.