Kənd Təsərrüfatı Nazirliyi fermerlərin 2020-2021-ci il payız əkinləri üzrə subsidiyalarının vaxtında verilməsi üçün onların əkin bəyanlarını tez və doğru təqdim etmələri məqsədilə rayonlarda fermerlər arasında maarifləndirmə aparır.

Nazirlik yanında Aqrar Kredit və İnkişaf Agentliyinin (AKİA) əməkdaşları Neftçala rayonunda əkinçi fermerlərlə görüşərək ölkənin ərzaq təhlükəsizliyini təmin etməkdə onların üzərinə böyük məsuliyyət düşdüyünü bildiriblər. Görüşlərdə qeyd edilib ki, fermerlər dövlətin hər zaman onların yanında olduğuna və kənd təsərrüfatı məhsullarının istehsalında onlara dəstək verdiyinə əmin olmalıdır.

Fermerlərə apardıqları əkinlər barədə Elektron Kənd Təsərrüfatı İnformasiya Sistemi (EKTİS) üzərindən bəyanın vaxtında və doğru təqdim edilməsinin vacibliyi bildirilib. EKTİS-də qeydiyyatdan keçmək qaydası, qeydiyyatı olanlara əkin bəyanı etmək, bəyan üçün lazım olan addımlar ətraflı izah edilib.

Qeyd edək ki, 2020-ci ildən başlayaraq fermerlərin aqrar subsidiyalar üçün müraciətləri elektron sistem üzərindən qəbul edilir və subsidiya məbləğləri onların “Fermer kartı”na köçürülür.

Payız əkinləri üçün bəyanlar ilin sonunadək davam edəcək.