Türkiyə Respublikasının Azərbaycandakı səfirliyi, Türk Əməkdaşlıq və Koordinasiya Agentliyi (TİKA) və “Dağ arıçıları” İctimai Birliyinin sədri, Qubadlı rayon sakini, arıçılıq üzrə mütəxəssis Yusif Quliyevin birgə köməkliyi ilə Sumqayıtda bal və bal məhsullarının qablaşdırılması və arı yemi istehsalı müəssisəsi yaradılıb.
Noyabrın 29-da Sumqayıt şəhərinin Yaşıldərə yaşayış massivində yerləşən müəssisənin açılış mərasimi keçirilib. Tədbirdə Türkiyənin ölkəmizdəki səfiri Erkan Özoral, Qubadlı Rayon İcra Hakimiyyətinin başçısı Malik İsaqov, TİKA-nın nümayəndəsi Teoman Tiryaki, “ABAD” (Ailə Biznesinə Asan Dəstək) publik hüquqi şəxsin direktoru Rüfət Elçiyev, Kənd Təsərrüfatı Nazirliyinin heyvandarlıq şöbəsinin mütəxəssisi Fəxrəddin Səmədov, rayonun idarə, müəssisə rəhbərləri və arıçılıqla məşğul olan şəxslər iştirak ediblər.
Açılış mərasimində Azərbaycanda arıçılığın inkişafına göstərilən dövlət dəstəyindən danışılıb, bu sahənin perspektivlərindən bəhs olunub. Bildirilib ki, arıçılığı inkişaf etdirmək məqsədilə son illərdə Qubadlı rayonu üzrə “Dağ arıçıları” İctimai Birliyi bir sıra tədbirlər həyata keçirib. Bunun nəticəsi olaraq arı ailələrinin sayı 5200-ə yaxınlaşıb. Arı ailələrinin sayının artırılması ilə yanaşı, məhsuldarlığın yüksəldilməsi, damazlıq-seleksiya işlərinin yaxşılaşdırılması, istehsal olunan arı məhsullarının mərkəzləşdirilmiş qaydada qablaşdırılması və etiketləmə məsələləri də diqqətdə saxlanılıb. Azərbaycan Prezidentinin sərəncamı ilə arıçılara subsidiyanın ayrılması isə bu sahənin inkişafına əlavə təkan verəcək.
Açılış mərasimindən sonra müəssisə ilə tanışlıq olub. Qeyd edilib ki, arıçılar tərəfindən istehsal edilən ballar müəssisədə “Dağ arıçıları” İctimai Birliyi tərəfindən qablaşdırılır və “Qarabağlı” markası altında satışa çıxarılır. İstehsal həcmi ildə 20 ton olan müəssisədə birinci mərhələdə məcburi köçkün arıçıların məhsulları bir marka ilə buraxılacaq. Həmçinin müəssisədə hər il 10 ton arı tortunun istehsalı da planlaşdırılır və arıçılara münasib qiymətə satılacaq.
Sonda tədbir iştirakçıları müəssisənin istehsal etdiyi arı məhsullarının sərgisi ilə tanış olublar.
9-10 dekabr tarixlərində “Kənddən Şəhərə” həftəsonu yarmarkası təşkil olunacaq
07 Dekabr 2023
Aqrar Sığorta Fondu zərər çəkən fermerlərə 2,8 milyon manat ödəniş edib
07 Dekabr 2023
Kişineuda Azərbaycan-Moldova iqtisadi əməkdaşlıq üzrə birgə hökumətlərarası komissiyanın 5-ci iclası keçirilib
07 Dekabr 2023
Aqrar Xidmətlər Agentliyinin sədri Sərdar Hacıyev Yevlaxda vətəndaşları qəbul edəcək
07 Dekabr 2023
“Ulu Öndər Heydər Əliyevin kənd təsərrüfatının inkişafında rolu” mövzusunda tədbir keçirilib
06 Dekabr 2023