Aqrar sahədə fəaliyyət göstərən fermer və sahibkarların dövlət dəstəyi alətləri barədə məlumatlandırılması, mövcud imkanlardan istifadənin təşviqi məqsədilə Yevlax rayonunda panel müzakirəsi təşkil edilib. Kənd Təsərrüfatı Nazirliyinin Aqrar İnnovasiya Mərkəzi və Yevlax Rayon İcra Hakimiyyətinin birgə təşkil etdiyi tədbirdə Kənd Təsərrüfatı Nazirliyinin, eləcə də digər dövlət qurumlarının, maliyyə və sığorta təşkilatlarının nümayəndələri və kənd təsərrüfatı istehsalçıları bir araya gəliblər.

Paneldə Kənd Təsərrüfatı Nazirliyi, Azərbaycan Qida Təhlükəsizliyi Agentliyi, “Aqrar Sığorta Müştərək Sığorta Şirkəti” ASC, Dövlət Məşğulluq Agentliyi və “Unibank” ASC-ni təmsil edən mütəxəssislər iştirak ediblər.

Yevlax Rayon İcra Hakimiyyətinin başçısı Anar Tağıyev rayonun aqrar potensialına, kənd təsərrüfatı istehsalının genişləndirilməsi imkanlarına, aqrar sektorun dayanıqlı inkişafının təmin olunmasında dövlət dəstəyi mexanizmlərinin roluna və fermerlərin dövlət dəstəyi proqramlarından faydalanmasının vacibliyinə diqqət çəkib.

Aqrar İnnovasiya Mərkəzinin direktoru Anar Cəfərov fermerlərin subsidiya, sığorta, kredit və digər dəstək mexanizmləri haqqında dolğun məlumat əldə etməsinin əhəmiyyətini vurğulayıb. Bildirib ki, panel müzakirələrinin əsas üstünlüyü istehsalçıların suallarının birbaşa aidiyyəti qurumların mütəxəssisləri tərəfindən cavablandırılmasıdır.

Görüş zamanı fermerlərə Aqrar Subsidiya Şurasının qərarlarında nəzərdə tutulan yeniliklər, əkin sahələrinin və kənd təsərrüfatı heyvanlarının sığortalanması, sertifikatlı toxumlarla təminat, toxumçuluq sahəsində mövcud tələblər, eləcə də güzəştli maliyyələşmə imkanları barədə ətraflı məlumat verilib.

Müzakirələrdə fermerlərin təklifləri və qarşılaşdıqları məsələlər dinlənilib, Sualları cavablandırılıb. İştirakçılara “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” və dövlət dəstəyi mexanizmlərindən yararlanma qaydalarına dair məlumatlar təqdim edilib.

Panel müzakirələri ilə yanaşı, rayon icra hakimiyyətinin binasında fermerlərin keyfiyyətli toxumlara çıxış imkanının genişləndirilməsi toxumçuluq subyektləri ilə fermerlər arasında əməkdaşlığın gücləndirilməsi məqsədilə toxum sərgi-satış yarmarkası da keçirilib. Burada sertifikatlı toxum nümunələrinin nümayişi və satışı həyata keçirilib. Fermerlər toxumlarla yaxından tanış olaraq onların əldə olunması ilə bağlı məlumat alıblar. Onlara regionun torpaq-iqlim xüsusiyyətlərinə uyğun sortların seçilməsi, toxumun təmizlənməsi, dərmanlanması, səpinin aparılması qaydaları haqqında ətraflı məlumat verilib və informasiya materialları təqdim edilib.