Bölgələrdə taxıl biçininə hazırlıq, mövcud vəziyyət və qarşıda duran vəzifələrlə bağlı məlumatlandırma sessiyaları davam edir. Lənkəran rayonunda keçirilən regional müşavirədə Kənd Təsərrüfatı Nazirliyinin rəhbərliyi, Lənkəran, Lerik, Astara, Masallı və Yardımlı rayonlarının icra hakimiyyəti strukturlarının məsul şəxsləri, Dövlət Aqrar İnkişaf Mərkəzlərinin direktorları, “Aqroservis” ASC-nin rəhbər şəxsləri və regional nümayəndəliklərinin, rayon bölmələrinin əməkdaşları, texniki nəzarət müfəttişləri, mühəndislər, mexanizatorlar və fermerlər iştirak ediblər.

Tədbiri giriş sözü ilə açan Lənkəran rayon İcra Hakimiyyətinin başçısı Taleh Qaraşov rayonun aqrar sektorunda görülən işlər, bu sahədə qarşıda duran vəzifələri diqqətə çatdırıb. O, bölgənin aqrar potensialından bəhs edib, ölkədə məqsədyönlü islahatların həyata keçirildiyini, bunun nəticəsində digər sahələr kimi aqrar sahənin də dinamik inkişaf etdiyini vurğulayıb. İcra başçısı əlavə edib ki, bu sahənin inkişafının təmin edilməsi məqsədilə rayon İcra Hakimiyyəti tərəfindən, müvafiq qurumlarla əlaqəli iş qurulur, yerlərdə fermer və istehsalçılar üçün əlverişli şərait yaradılır.

Müşavirədə çıxış edən kənd təsərrüfatı nazirinin müavini Elçin Zeynalov qeyd edib ki, Azərbaycan Respublikasının Prezidenti cənab İlham Əliyev tərəfindən aqrar sahənin inkişafı prioritet istiqamət kimi elan edilib. Kənd təsərrüfatının, o cümlədən də strateji sahə olan taxılçılığın inkişafı məqsədilə mühüm islahatlar keçirir. Həyata keçirilən aqrar islahatlar kənd təsərrüfatının daha da inkişafını nəzərdə tutur və bu məqsədlə dövlət tərəfindən çox böyük dəstək tədbirləri həyata keçirilir. Kənd təsərrüfatının müxtəlif sahələrinin inkişafı üçün subsidiyaların verilməsi, aqrar sahədə texnika təminatı ilə bağlı dövlət tərəfindən güzəştlərin tətbiq edilməsi, o cümlədən fermerlərə güzəştli kreditlərin verilməsi aqrar sektorun dayanıqlı inkişafına real zəmin yaradır. Ərzaq təhlükəsizliyinin gücləndirilməsi üçün taxılçılığın inkişaf etdirilməsinin əsas hədəflərdən olduğunu deyən Elçin Zeynalov bildirib ki, taxılın vaxtında və itkisiz yığılması istiqamətində koordinasiya olunmuş fəaliyyət mühüm əhəmiyyət kəsb edir.  

“Aqroservis” ASC-nin İdarə Heyətinin sədri Mehman Veysəlov taxıl biçininin təşkili, mövcud vəziyyət və qarşıda duran vəzifələr barədə tədbir iştirakçılarına ətraflı məlumat verib. Qeyd olunub ki, hər il olduğu kimi bu il də bölgələrdə taxıl biçini prosesinin mütəşəkkil təşkili üçün Kənd Təsərrüfatı Nazirliyi və tabeli qurumları tərəfindən davamlı olaraq zəruri tədbirlər həyata keçirilib. Mehman Veysəlov bildirib ki, görülən işlər taxıl biçininin optimal müddətdə başa çatdırılmasına imkan verir. 

Müşavirədə qeyd olunub ki, bu il Lənkəran, Lerik, Astara, Masallı və Yardımlı rayonlarında ümumilikdə 17 min hektardan çox sahədə taxıl əkilib, hazırda məhsulun vaxtında və itkisiz yığılması istiqamətində koordinasiya olunmuş fəaliyyət həyata keçirilir.

Müşavirədə biçin zamanı qarşıya çıxa biləcək çətinliklər, onların həlli yolları müzakirə edilib, fermer və mexanizatorların təklifləri dinlənilib, qaldırılan məsələlərin operativ həlli üçün müvafiq tapşırıqlar verilib.