BMT-nin Azərbaycandakı Ərzaq və Kənd Təsərrüfatı Təşkilatının Tərəfdaşlıq və Əlaqələndirmə Ofisi (FAO) Azərbaycan Respublikasının Kənd Təsərrüfatı Nazirliyi ilə birgə oktyabr və noyabr aylarında “Təkmilləşdirilmiş Su İdarəçiliyi: Kənd Təsərrüfatının Davamlı İnkişafına Doğru” layihəsi çərçivəsində suyun idarə edilməsi və suvarma üzrə təlimlər təşkil edib.

Təlimlər 11 rayonda - Tovuz, Şəmkir, Göyçay, Kürdəmir, Sabirabad, Beyləqan, İmişli, Lənkəran, Biləsuvar, Yevlax və Şəkidə təşkil olunub. 275 fermerin iştirak etdiyi təlimlərdə müasir suvarma sistemlərinin müxtəlif aspektləri, o cümlədən potensial problemləri, qlobal və yerli səviyyədə su ilə bağlı müşahidə olunan problemlər barədə danışılıb, su təminatı ilə bağlı yaranan çətinliklərinin qarşısının alınması yolları müzakirə edilib. Müxtəlif növ suvarma alətləri, onlardan istifadə üsulları nümayiş etdirilib.

Təlim məşğələləri zamanı suvarma üsullarına dair məlumatların əks olunduğu tədris materialları paylanılıb.