Kənd Təsərrüfatı Nazirliyi yanında Aqrar Xidmətlər Agentliyinin Respublika Bitki Mühafizəsi Mərkəzinin yerli mütəxəssisləri tərəfindən Abşeron rayonu ərazilərində, əsasən Novxanı, Corat, Binəqədi, Fatmayı və Goradil bağları ərazilərindəki meşə zolaqlarında, yol kənarlarında əkilmiş tut ağaclarında, dövlət fond və bələdiyyə torpaqlarında karantin zərərvericilərinə qarşı müşahidə və mübarizə tədbirlərinə başlanılıb. Belə ki, 1014 hektar ərazidə karantin zərərvericisi olan yastıcalar və   Amerika ağ kəpənəyinə qarşı mübarizə aparmaq  məqsədi  ilə müşahidə  aparılıb. Müşahidələr  zamanı  25  ha  ərazidə Yaponiya  yalançı qalxanlı mumlu yastıcası, 3  ha  ərazidə isə Komstok yastıcası aşkar  edilib. Amerika  kəpənəyi  ilə  bağlı aparılmış  müşahidələr zamanı isə  25  ha  ərazidə   sirayətlənmə  aşkar   edilib. Sirayətlənmiş 25 ha ərazidə  yastıcalara  qarşı  hektara  400  qr  hesab  norması  ilə  Hekvidor  350 SC preparatı ilə  kimyəvi  mübarizə, 25  ha  ərazidə  isə  Amerika  ağ  kəpənəyinə  qarşı  mexaniki  mübarizə tədbirləri aparılıb.

Qeyd edək ki, Amerika ağ kəpənəyinin tırtırları tərəfindən yarpaqların yeyilməsi bitkilərin zəifləməsinə, çoxsaylı zədələnmələr nəticəsində isə məhv olmasına səbəb olur. Azərbaycanda iki nəsil verir. Bəzi illərdə 3-cü natamam nəslin əmələ gəlməsi müşahidə olunur, lakin payızda soyuqların düşməsi nəticəsində kiçik yaşlı tırtıllar məhv olur. Qışlamış nəslin ilk fərdlərinin pupdan uçması may ayında, ikinci nəslin uçması isə iyulun əvvəllərində baş verir.

Karantin zərərvericisi olan Amerika ağ kəpənəyinə qarşı mübarizə tədbirlərinin vaxtını müəyyən etmək məqsədi ilə zərərvericinin yayıldığı ərazilərdə qidalandığı bitkilər üzərində hər bir nəslin inkişafı dövründə vaxtaşırı müşahidələr aparılmalıdır. Zərərverici müşahidə edilən ağaclar üzərində tırtılların əmələ gətirdikləri torlu yuvalar kəsilərək tırtıllarla birlikdə məhv edilməli, ağaclar isə dərhal insektisidlərin biri ilə dərmanlanmalıdır.

Zərərvericinin hər nəslinə qarşı insektisidlərə həssas kiçik yaşlı tırtılların kütləvi əmələ gəlməsi dövründə dərmanlama aparmaq daha səmərəlidir. Payızda gövdəətrafı və cərgə aralarında torpaq şumlanmalıdır. Zərərverici əleyhinə karantin, aqrotexniki, mexaniki, bioloji və kimyəvi mübarizə üsullarından sistemli şəkildə istifadə etməklə, yüksək səmərə əldə etmək olar.

Bildiririk ki, bağlarda, parklarda, həyətyanı sahələrdə, meşə zolaqlarında, tingliklərdə və digər yerlərdə zərərverici aşkar edildiyi hallarda təcili olaraq AXA-nın bitki mühafizəsi mərkəzlərinə məlumat verilməli, yeni aşkar olunmuş mənbələrdə təcrid və ləğvedici tədbirlər həyata keçirilməlidir.

Hazırda karantin zərərvericilərinə qarşı müşahidə və mübarizə tədbirləri davam etdirilir.