Aqrar Xidmətlər Agentliyinin Bitki mühafizəsi və Fumiqasiya (zərərsizləşdirmə) Mərkəzinin mütəxəsisləri tərəfindən xüsusi təhlükəli zərərverici olan çəyirtkəkimilərə qarşı mübarizə tədbirləri həyata keçirilir. Belə ki, aparılan fitosanitar müşahidələrə əsasən Gürcüstan Respublikası ilə sərhəd zolağında yerləşən Samux rayonu Burunqovaq kəndi ərazisinə Gürcüstan Respublikasına məxsus təbii otlaq sahələri istiqamətindən xüsusi təhlükəli zərərverici  hesab edilən mərakeş (Dociostaurus maroccanus) çəyirtkələrinin 1-2 yaş mərhələsində olan sürfə dəstələrinin miqrasiyası müəyyən edilib. Çəyirtkə dəstələrinin uçuş koordinatları və ümumi ərazisi müəyyənləşdirilib. Kimyəvi mübarizə tədbirlərinin vaxtında, operativ həmçinin optimal müddətdə və mobil texnikalar vasitəsilə aparılması nəticəsində cəyirtkə miqrasiyasının ziyan vurma həddi minumuma endirilib. AparıIan kimyəvi mübarizənin 90-95% səmərəliyi olub.

Hazırda həmin ərazilərdə fitosanitar müşahidələr davam etdirilir, zərərveriçinin aşkarlanan xırda dəstələrə qarşı mübarizə tədbirləri həyata keçirilir. Aqrar Xidmətlər Agentliyi kənd təsərrüfatı fəaliyyəti ilə məşğul olan fermer və sahibkarların nəzərinə çatdırır ki, təsərrüfatlarında adıçəkilən zərərverici müşahidə edildiyi halda dərhal Aqrar Xidmətlər Agentliyinin müvafiq yerli qurumlarına Rayon Bitki mühafizəsi və Fumiqasiya (zərərsizləşdirmə) Mərkəzlərinə və ya Kənd Təsərrüfatı Nazirliyinin 1652 Çağrı mərkəzinə məlumat versinlər.