Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə edilməsi üzrə Dövlət Xidmətinin təşkilatçılığı ilə fermer və kənd təsərrüfatı məhsulları istehsal edən sahibkarlara güzəştli kreditlərin verilməsi sahəsində şəffaflığı təmin etmək məqsədilə bir sıra bank və bank olmayan təşkilatlarla niyyət protokollarının imzalanma mərasimi keçirilib.

Mərasimdə  bank və kredit təşkilatlarının nümayəndələri ilə yanaşı, Azərbaycan Hökuməti ilə kənd təsərrüfatı layihələrini həyata keçirən bir sıra nüfuzlu beynəlxalq təşkilatların – Dünya Bankının, Beynəlxalq Maliyyə Korporasiyasının, BMT-nin Ərzaq və Kənd təsərrüfatı üzrə Təşkilatının (FAO-nun), Avropa Yenidənqurma və İnkişaf Bankının,  eləcə də Maliyyə Bazarlarına Nəzarət Palatasının, Azərbaycan Sahibkarlar Təşkilatları Milli Konfederasiyasının, Azərbaycan Nar İstehsalçıları və İxracatçıları Assosiyasiyasının təmsilçiləri də iştirak ediblər.

Tədbiri giriş sözü ilə açan Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Anar Hüseynov ölkə başçısının aqrar sahəyə göstərdiyi diqqət və qayğıdan söhbət açaraq kənd təsərrüfatının yeni inkişaf mərhələsinə qədəm qoyduğunu qonaqların diqqətinə çatdırıb.

Dövlət Xidmətinin rəisi Mirzə Əliyev çıxışında aqrar sahənin inkişafı üçün ölkədə fermer və kənd təsərrüfatı məhsullarının istehsalı ilə məşğul olan sahibkarların güzəştli kreditlərə çıxış imkanlarının artırılmasının vacibliyini bildirib. Onun sözlərinə görə, kreditlərin verilməsində şəffaflığı təmin etmək, aqrar sahə üçün kreditləri daha əlçatan etmək, eləcə də daha sağlam bank və kredit təşkilatlarını kənd təsərrüfatı kreditlərinin verilməsinə cəlb etmək üçün banklarla Dövlət Xidmətinin əməkdaşlığı yenidən nəzərdən keçirilib. İlin sonunadək Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti müvəkkil banklar vasitəsilə fermerlərə 10 milyon manatadək məbləğdə kredit verməyi planlaşdırır. “Kreditlər vətəndaşlara maksimum 7%-lə veriləcək. Bütün ölkəni əhatə edən iri bankların müvəkkil bank kimi seçilməsi fermerlərdən girov kimi paytaxtda daşınmaz əmlak tələb edilməsinə də son qoyacaq”, – deyə xidmət rəisi qeyd edib.  

FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmak Azərbaycanın kənd təsərrüfatı sektorunun son illərdə əldə etdiyi nailiyyətlər barədə məlumat verib. Bildirib ki, aqrar sahənin inkişafı ilə əlaqədar dövlət siyasətinin əsas istiqamətləri ərzaq məhsulları üzrə idxaldan asılılığı azaltmaq, ərzaq təhlükəsizliyini gücləndirmək və ixrac potensialını artırmaqla ölkəni əsas ixracatçı ölkələr sırasına gətirməkdir.

Dünya Bankının Azərbaycandakı ofisinin nümayəndəsi Rufiz Çıraqzadə bildirib ki, kənd təsərrüfatı sahəsi Dünya Bankı üçün həmişə prioritet sahələrdən biri olub. Bankın dəstəyi ilə Azərbaycanda keçirilən layihələr bu sektorun müxtəlif sahələrini əhatə edib.

Qeyd edək ki, niyət protokolları Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti tərəfindən “Azərbaycan Beynəlxalq Bankı” ASC, “Paşa Bank” ASC, “Kapital Bank” ASC, “Turanbank” ASC, “Rabitəbank” ASC, “Aqrarkredit” QSC BOKT, “Finoko” BOKT ASC, “Finans İnvest” BOKT ilə bağlanılıb.