Azərbaycan Dövlət Aqrar Universitetində (ADAU) Avropa İttifaqının Təhsil, Audiovizual və Mədəniyyət İcra Agentliyi (EACEA) Ali Təhsil Sahəsində Bacarıqların Artırılması (Key Action 2) üzrə Erasmus+ proqramı çərçivəsində “Azərbaycanda doktorantura təhsilinin təkmilləşdirilməsi və vahid Avropa ali təhsil məkanının tələblərinə uyğun strukturlaşdırılması” - NİZAMİ layihəsinin yekununa dair seminar keçirilib.
Seminarda ADAU-nun, Azərbaycan Texnologiya Universitetinin, Gəncə Dövlət Universitetinin, AMEA Gəncə Bölməsinin, Heyvandarlıq elmi-tədqiqat institutunun, Bitki Mühafizəsi və Texniki Bitkilər elmi-tədqiqat institutunun və Aqromexanika elmi-tədqiqat insitutunun nümayəndələri, 75 doktorant və dissertant iştirak edib.
Seminarda çıxış edən natiqlər Azərbaycanda doktorantura təhsil sistemində aparılan məqsədyönlü islahatlardan danışıblar. Bu sahədə müasir dövrün çağırışlarından irəli gələn vəzifələri diqqətə çatdıran çıxışçılar bütün bunların yüksək ixtisaslı gənc kadrların hazırlanmasına yönəldiyini bildiriblər. Sözügedən layihənin Azərbaycan doktorantura təhsil sisteminə töhfə verəcəyini söyləyən natiqlər Avropanın aparıcı universitetlərinin bu layihədə iştirakının birgə təcrübə mübadiləsi aparmaq üçün geniş imkanlar yaratdığını qeyd ediblər.
Layihənin meneceri Abbas İsmayılov Avropa və Azərbaycan universitetləri arasında təcrübə mübadiləsi ilə üç il yarım davam etmiş (2015-2019) layihə barədə danışaraq qeyd edib ki, Azərbaycanda doktorantura təhsilinin Avropa Ali Təhsil sahəsinin tələblərinə uyğun yenidən qurulması və inkişaf etdirilməsi istiqamətində tərəfdaş qurumlar birgə iş aparıb, ölkəmizin Avropa təhsil sisteminə inteqrasiyasını təşkil ediblər. Abbas İsmayılov Monpelye Universitetinin koordinator olduğu layihədə Azərbaycandan Təhsil Nazirliyi, AMEA, Azərbaycan Dövlət Aqrar Universiteti, Azərbaycan Texniki Universiteti, Azərbaycan Memarlıq və İnşaat Universiteti, Azərbaycan Dillər Universiteti, Azərbaycan Dövlət İqtisad Universiteti, Bakı Dövlət Universiteti, Naxçıvan Dövlət Universiteti, Bakı Mühəndislik Universiteti, Xəzər Universiteti, Avropa tərəfdaşlarından isə Fransanın Monpelye, İsveçin Uppsala, Almaniyanın Heydelberq, Çexiyanın Mazarıkova və İspaniyanın Barselona universitetlərinin iştirak etdiyini seminar iştirakçılarının diqqətinə çatdırıb. 
Proqramın məqsədi Avropa universitetləri ilə mübadilə təşkil edərək, Azərbaycanda doktorantura təhsilinin yenidən qurulması, uyğunlaşdırılması və inkişaf etdirilməsinə uyğun olaraq PhD-nin mükəmməlliyinin artırılması, ali təhsil müəssisələrinin beynəlmiləlləşməsinin inkişaf etdirilməsi, Azərbaycanı yüksək keyfiyyətli doktorantura təhsili ilə təmin etmək (tədqiqat, innovasiya və təhsil əlaqələri vasitəsilə), NİZAMİ layihəsi vasitəsilə ali təhsil müəssisələri arasında əməkdaşlığı möhkəmləndirmək və Azərbaycan doktorantura təhsilini avropada təşviq etməkdən ibarətdir.
Sonda seminar iştirakçılarını maraqlandıran suallar cavablandırılıb, müzakirələr aparılıb.